ယနေ့ခေတ်မှာ အဖြစ်များလာတဲ့ ကျန်းမာရေးခြိမ်းခြောက်မှုကြီးကတော့ ဆီးချိုရောဂါပဲ ဖြစ်ပါတယ်။ အသက်အရွယ်ကြီးငယ်မရွေး ဖြစ်ပွားနိုင်တာကြောင့် မပေါ့ဆဘဲ ကြိုတင်ကာကွယ်ထားသင့်တဲ့ ရောဂါတွေထဲက တစ်မျိုးလည်းဖြစ်ပါတယ်။ လူတော်တော်များများက သူတို့ကိုယ် သူတို့ ဆီးချိုရှိမှန်းတောင် မသိဘဲ နေထိုင်နေတတ်ကြပြီး အချိန်လွန်မှ သိကြတာကြောင့် မလိုအပ်ဘဲ အသက်ဆုံးရှုံးရတဲ့ဖြစ်ရပ်မျိုးတွေ ကမ္ဘာအနှံ့အပြားမှာ ဖြစ်ပွားလျက်ရှိပါတယ်။ ဆီးချိုရောဂါဖြစ်ပွားတဲ့ ဉီးရေဟာဆိုရင် အိန္ဒိယနိုင်ငံကအများဆုံးဖြစ်ပြီး အရေှ့တောင်အာရှနိုင်ငံအများစုမှာလည်း ဆီးချိုကြောင့်သေဆုံးမှုရာခိုင်နှုန်းက တရိပ်ရိပ်မြင့်တက်လျက်ရှိပါတယ်။ ဒီတစ်ခေါက်တော့ စာဖတ်သူပရိသတ်ကြီးအတွက် ဆီးချိုရောဂါ ဘာကြောင့်ဖြစ်ရလဲဆိုတဲ့ တရားခံအကြောင်းအရင်းတွေနဲ့ သူ့ရဲ့ ရှေ့ပြေးလက္ခဏာတွေကို ပြောပြပေးမယ်နော်။ ဆီးချိုရောဂါဆိုတာ ဆီးချိုဆိုတာ ခန္ဓာကိုယ်တွင်း သကြားဓာတ်အသုံးပြုမှုကို ထိခိုက်စေတဲ့ ရောဂါတစ်မျိုးပါ။ သွေးတွင်းသကြားဓာတ်ကို တစ်နည်းအားဖြင့် ဂလူးကို့စ်လို့ခေါ်ပါတယ်။ ဂလူးကို့စ်က ကွျန်တော်တို့ ခန္ဓာကိုယ်ရဲ့ ကြွက်သားတွေ၊ တစ်သျှူးတွေနဲ့ ဉီးနေှာက် ကျန်းမာစေဖို့အတွက် အဓိကလိုအပ်တဲ့ အားဖြည့်လောင်စာပါ။ ခန္ဓာကိုယ်မှာ သကြားဓာတ်လွန်ကဲလာတဲ့အခါ ဆီးချိုသွေးချိုရောဂါအပြင် တခြားကျန်းမာရေး ပြသနာတွေကို ခံစားရလာနိုင်ပါတယ်။ ဆီးချိုအမျိုးအစား ၃ မျိုးရှိပြီးတော့ အသက် ၄၀ ကျော် လူတော်တော်များများမှာအဖြစ်များတာက အမျိုးအစား (၂) ဆီးချိုဖြစ်ပါတယ်။ အမျိုးအစား (၁) ဆီးချိုက ဆယ်ကျော်သက်လူငယ်တွေမှာတွေ့ရတတ်ပြီး နောက်ဆုံးတစ်မျိုးကတော့ ကိုယ်ဝန်ဆောင်ဆီးချိုပဲ ဖြစ်ပါတယ်။ ကိုယ်ဝန်ဆောင်ကာလပြီးရင် ပျောက်သွားတတ်ပေမဲ့ ပေါ့ပေါ့ဆဆနေမယ်ဆိုရင် အကင်းအရှင်းမပျောက်ဘဲ ကျန်တဲ့ ဆီးချိုအမျိုးအစား (၂) မျိုးပြန်ဖြစ်ဖို့ ရာခိုင်နှုန်း များပါတယ်။ အတိုချုပ်ပြောရရင် အချိုစားသုံးမှုများလာတဲ့အတွက် ဆီးချိုအစပြုလာတယ်။ ဒါကတော့ လူအများစုသိထားတဲ့ ဆီးချို ဖြစ်ရတဲ့ အကြောင်းအရင်းတွေထဲက တစ်ခုပဲဖြစ်ပါတယ်။ ဒါပေမဲ့ အချိုစားသုံးမှုများတာအပြင်ကိုမှ တခြားဆီးချိုဖြစ်စေတဲ့ တရားခံတွေလည်း ရှိနေပါသေးတယ်။ ဘာကြောင့်ဆီးချိုဖြစ်ရသလဲ? အမျိုးအစား – ၁ ဆီးချိုရောဂါဘာကြောင့်ဖြစ်ရတာလဲ ရောဂါတွေ ဘက်တီးရီးယားဗိုင်းရပ်စ်တွေကို တိုက်ထုတ်ပေးတဲ့ ကိုယ်ခံအားစနစ်က ဗိုင်းရပ်စ်ပိုးတွေကို တိုက်ထုတ်မဲ့အစား ပန်ကရိယထဲက အင်ဆူလင်ထုတ်ပေးတဲ့ဆဲလ်တွေကို တိုက်ခိုက်ဖျက်ဆီးပစ်လိုက်တယ်။ သွေးတွင်းသကြားဓါတ်တွေကို ချေဖျက်ပေးဖို့ အင်ဆူလင်တွေ အလွန်နည်းသွားတာ၊ လုံးဝမကျန်တော့တဲ့ အခြေအနေကို ရောက်သွားတယ်။ ဒီအခါမှာ ဂလူးကို့စ်တွေဟာ အားအင်မဖြစ်တော့ပဲ သွေးထဲမှာ စုပုံလာပြီး အမျိုးအစား (၁) ဆီးချိုရောဂါ ဖြစ်လာပါတယ်။ ဒါ့အပြင် ကိုယ်ရဲ့ ဆွေမျိုးထဲက တစ်ယောက်ယောက်မှာ ဆီးချိုဝေဒနာရှင်ရှိခဲ့ဖူးတာ၊ ငယ်ငယ်က ဗိုင်းရပ်စ်ပိုးကူးစက်ခံရပြီး အပြင်းဖျားတာ၊ အစားအသောက်ထဲမှာပါတဲ့ဓာတုဆေးဝါးတွေ စတဲ့ အကြောင်းအရာတွေကြောင့်လည်း ဆီးချိုရောဂါခံစားရနိုင်ပါတယ်။ အမျိုးအစား – ၂ ဆီးချိုရောဂါဘာကြောင့်ဖြစ်ရတာလဲ သင့်ခန္ဓာကိုယ်ဆဲလ်တွေက အင်ဆူလင်ရဲ့လုပ်ဆောင်မှုတွေကို အနှောက်အယှက်ဖြစ်စေပြီးတော့ သင့်ရဲ့ ပန်ကရိယက အဲဒီဆဲလ်တွေရဲ့ နှောက်ယှက်မှုကို ကျော်လွှားနိုင်ဖို့ အင်ဆူလင်အလုံအလောက် မထုတ်လုပ်နိုင်တော့တဲ့အခါ သကြားဓာတ်က သွေးထဲမှာပဲ စုပုံလာပြီး အမျိုးအစား (၂) ဆီးချို ခံစားရစေပါတယ်။ များသောအားဖြင့် ဒီဆီးချိုအမျိုးအစားက မျိုးရိုးလိုက်တာကြောင့်ဖြစ်ပြီး အဝလွန်သူတွေမှာ အဖြစ်များပါတယ်။ ဒါပေမဲ့ ပိန်တဲ့သူတွေမှာလည်း ဖြစ်နိုင်ပါတယ်။ အထိုင်များတာ၊ အသက်အရွယ်အိုမင်းလာတာ၊ စားသောက်မှုပုံစံမမှန်တာ၊ သွေးတိုးရှိတာ၊ သွေးတွင်းကိုလက်စထရောများတာတွေကလည်း အမျိုးအစား(၂)ဆီးချိုဖြစ်ရတဲ့ အကြောင်းအရင်းတွေ ဖြစ်ပါတယ်။ ကိုယ်ဝန်ဆောင်ဆီးချို ဘာကြောင့်ဖြစ်ရတာလဲ ကိုယ်ဝန်ဆောင်ကာလအတွင်းမှာ သန္ဓေသား ကျန်းမာစေဖို့အတွက် အချင်းကနေ ဟော်မုန်းထုတ်လေ့ရှိပါတယ်။ အဲဒီဟော်မုန်းက အင်ဆူလင်ရဲ့ လုပ်ဆောင်ချက်တွေကို အတားအဆီးဖြစ်စေတာကြောင့် သွေးတွင်းသကြားဓာတ်တွေက ဆဲလ်တွေထဲကို မသွားနိုင်ဘဲ သွေးထဲကို ရောက်သွားတာကြောင့် ကိုယ်ဝန်ဆောင်ဆီးချိုဖြစ်ပွားပါတယ်။ အဝလွန်ခြင်း၊ ကိုယ်ဝန်ဆောင်ဆီးချိုမျိုးရိုးရှိခြင်း၊ သနေ္ဓသားအလေးချိန် ၉ ပေါင်ကျော်နေမယ်ဆိုရင်လည်း ကိုယ်ဝန်ဆောင်ဆီးချို ဖြစ်နိုင်တာကြောင့် သတိထားသင့်ပါတယ်။ ဆီးချိုရှေ့ပြေးလက္ခဏာများ သင့်မှာ ဆီးချို ရှိမရှိ ဘယ်လိုသိနိုင်မလဲ? ရေှ့ပြေးလက္ခဏာအများစုက သွေးတွင်းသကြားဓာတ်ပုံမှန်ထက်မြင့်နေတာကြောင့် ပေါ်လာလေ့ရှိပါတယ်။ အမျိုးအစား (၂) ဆီးချိုအတွက် လက္ခဏာတွေက သိပ်ပြလေ့မရှိပါဘူး။ ဒါကြောင့် လူတွေက အချိန်လွန်မှ သိလေ့ရှိပြီး ရောဂါက အတော်အသင့်ကွျမ်းနေပြီး ဖြစ်နေတတ်ပါတယ်။ အသက်အန္တရာယ်ကိုပါ ချိန်းခြောက်နိုင်တဲ့ရောဂါမျိုးဖြစ်တာကြောင့် မိမိဘက်က ကြိုတင်ပြင်ဆင်ပြီး ဆီးချိုစစ်ကြည့်ခြင်းက အရှုံးမရှိပါဘူး။ အမျိုးအစား(၁) ဆီးချိုလက္ခဏာတွေကတော့ အတော်လေး ထင်ရှားပြီး မြန်ပါတယ်။ ရက်သတ္တပတ် ၁ ပတ် အတွင်းမှာပဲ လျင်လျင်မြန်မြန်ပေါ်လာလေ့ရှိပါတယ်။ - ဆီးခဏခဏသွားတာ - ရေအရမ်းငတ်တာ - ကိုယ်အလေးချိန်ကျလာတာ - ခဏခဏဆာတာ - ခြေကုန်လက်ပန်းကျတာ - အရေပြားပြဿာနာတွေခံစားရတာ - အနာကျက်နှေးတာ - မှိုပိုးကူးစက်တာ - ခြေဖျားလက်ဖျားတွေ ထုံကျဉ်တာ ဆီးချိုရောဂါအကြိုလက္ခဏာ ဒါမှမဟုတ်ဆီးချိုဖြစ်တဲ့ လက္ခဏာတွေရှိနေပြီလို့ သံသယရှိတယ်ဆိုရင် ကျွမ်းကျင်တဲ့ ဆရာဝန်နဲ့ပြသပြီး ကုသမှုခံယူဖို့လိုအပ်မှာဖြစ်ပါတယ်။
မျက်စိပါဝါတိုးလာတယ် ဆလင်ဒါတိုးလာတယ်ဆိုတာ မျက်စိဆရာဝန်ဆီသွားတိုင်း ကြားရလေ့ရှိတဲ့ အသုံးအနှုန်းတွေပဲ ဖြစ်ပါတယ်။ ဒါပေမဲ့ လူတွေက ပေါ့ပေါ့လေး သဘောထားပြီး ဆေးစစ်ချက်အဖြေကိုတောင် သေချာမကြည့်ဘဲ မျက်မှန်ဆိုင်ကို စာရွက်ပြပြီး မျက်မှန်ကိုင်းလှလှလေး ရွေးဖို့ကိုပဲ စိတ်အားထက်သန်နေကြတတ်ပါတယ်။ မျက်မှန်ပါဝါဆိုတာ အနီးမှုန်နဲ့ အဝေးမှုန်ကို သတ်မှတ်ပေးတာဖြစ်ပြီး ဆရာဝန်တွေကတော့ sphere လို့သုံးလေ့ရှိပါတယ်။ မျက်စိပါဝါကို diopters (D) unit နဲ့တိုင်းပါတယ်။ Sphere မှာ (+) လက္ခဏာ သို့မဟုတ် ဘာလက္ခဏာမှမပါဘဲ ဆိုရင် အနီးမှုန် ( short-sighted )ပါဝါကိုဖော်ပြပြီး (-) နဲ့ဆိုရင် အဝေးမှုန် ( Long-sighted )ပါဝါဖြစ်ပါတယ်။ ယေဘုယျအားဖြင့် အသက်ကြီးတဲ့ လူကြီးပိုင်းတွေက အနီးမှုန်လေ့ရှိပြီးတော့ ယနေ့ခေတ် လူငယ်အများစုက ဖုန်း၊တီဗီ၊ ဂိမ်း အစရှိတဲ့ အီလက်ထရောနစ်ပစ္စည်းတွေကို အသုံးများလာတာနဲ့အမျှ အဝေးမှုန်တွေလည်း များလာကြပါတယ်။ ဒါ့ကြောင့် အဝေးမှုန်သူတွေရော အနီးမှုန်သူတွေရောအတွက် မျက်စိပါဝါကျပြီး ကျန်းမာတဲ့ မျက်လုံးလေးတွေကို ပိုင်ဆိုင်နိုင်ဖို့ အောက်ပါအချက်လေးတွေကို လိုက်နာသင့်ပါတယ်။ (၁) မျက်လုံးကျန်းမာရေးအတွက် ကောင်းသော အစားအစာများကို စားပါ။ အစားအသောက်စားရာမှာ မျက်စိအာဟာရဓာတ်ပြည့်ဝစေမယ့် Vitamin A, Vitamin C, Lutein, Veta Carotene ကြွယ်ဝတဲ့ မုန်လာဉနီ၊ ငါးကြီးဆီ၊ သဘောသီး၊ အခွံမာသီး၊ ပန်းဂေါ်ဖီစိမ်း၊ ဟင်းနုနွယ်ရွက်၊ ကန်စွန်းဉ၊ ကိုက်လန်၊ ငါးအမျိုးမျိုး၊ ဉအမျိုးမျိုး၊စပျစ်သီးနဲ့ သွေးလည်ပတ်မှုအားကောင်းစေတဲ့ ဘယ်ရီသီးတို့ကို နေ့တိုင်းလိုလို စားသုံးပေးသင့်ပါတယ်။ ဤသို့ စားသုံးခြင်းက မျက်စိသွေးလည်ပတ်မှုကို အားကောင်းစေပြီး ပါဝါကို ထိန်းပေးထားနိုင်မှာ ဖြစ်ပါတယ်။ ပါဝါသမားတွေနဲ့ ဆီးချိုသမားတွေကတော့ အချိုရှောင်သင့်ပါတယ်။ သကြားဓာတ်က ခန္ဓာကိုယ်အတွက် မကောင်းသလို အမြင်လွှာကိုလည်း ပျက်စီးစေပါတယ်။ (၂) မျက်လုံးကို အနားပေးပါ။ မျက်မှန်ပါဝါကျဖို့အတွက်ဆို မျက်လုံးကို ကောင်းစွာ အနားပေးဖို့ သေချာပေါက်လိုအပ်ပါတယ်။ အိပ်ရေးမဝတာကလည်း မျက်လုံးကိုထိခိုက်စေတဲ့ အကြောင်းအရင်းထဲက တစ်ခုဖြစ်တာကြောင့် အိပ်ရေးဝအောင် အိပ်စက်သင့်ပါတယ်။ တစ်နေကုန် ဖုန်းနဲ့ ကွန်ပြူတာတေွကို ကြည့်နေရတဲ့အခါ မျက်စိညောင်းလာပြီး အမြင်အာရုံတွေ ဝေဝါးလာတတ်ပါတယ်။ အလုပ်ကြောင့် ကျောင်းကြောင့် မဖြစ်မနေ အာရုံစိုက်နေရတယ်ဆိုရင်တောင် ကြားမှာ မျက်စိကို ခဏအနားပေးဖို့ လိုအပ်ပါတယ်။ ညဘက်အိပ်ခါနီး မျက်စိပေါ်မှာ သခွါးသီးပါးပါးလှီးပြီး ကပ်ပေးခြင်းဖြင့်လည်း မနက်အိပ်ရာထတဲ့အခါ မျက်လုံးကို ကြည်လင်လန်းဆန်းစေမှာ ဖြစ်ပါတယ်။ မျက်လုံးမခြောက်အောင် မကြာခဏ မျက်တောင်ခတ်ပေးပြီး အစိုဓာတ်ပြည့်ဝနေေစဖို့ ရေများများသောက်ပေးဖို့လည်း လိုအပ်ပါတယ်။ (၃) မျက်စိလေ့ကျင့်ခန်းလုပ်ပါ။ ကွန်ပြူတာရေှ့မှာ အထိုင်များတဲ့လူတွေအတွက် မျက်စိလေ့ကျင့်ခန်းလုပ်ဖို့ အထူးအရေးကြီးပါတယ်။ နာမည်အကြီးဆုံးနဲ့ လူသုံးအများဆုံးနည်းကတော့ 20-20-20 လို့ခေါ်တဲ့ ကွန်ပြူတာကို မိနစ် ၂၀ ကြည့်ပြီးတိုင်း ပေ ၂၀ အကွာက အရာဝတ္ထုကို စက္ကန့် ၂၀ ကြာကြည့်ပေးရတဲ့ နည်းလမ်းဖြစ်ပါတယ်။ ပတ်ဝန်းကျင်မှာရှိတဲ့ စိမ်းစိမ်းစိုစိုအပင်တွေကို ကြည့်ပေးခြင်းဖြင့် မျက်စိကို အကြောဖြေပေးပါ။ နောက်တစ်မျိုးက ခေါင်းငုံ့ခေါင်းမော့လေ့ကျင့်ခန်းကို ပြုလုပ်ပေးပါ။ ပြီးရင် မျက်လုံးကို အပေါ်ကြည့်ပြီး နာရီလက်တံလည်သလို ဖြည်းဖြည်းချင်း လှည့်ကစားပေးပါ။ ပြီးလှျင် ပိတ်လိုက်ဖွင့်လိုက် လုပ်ပေးပါ။ ထို့နောက် မျက်စိညောင်းလာတယ်လို့ ခံစားရတိုင်း လက်ဖဝါးနှစ်ဖက်ကို ပွတ်တိုက်ပြီး ပူနွေးလာအောင်လုပ်ကာ မျက်လုံးနှစ်ဖက်ပေါ်သို့ အုပ်ထားပြီး ၅ မိနစ် သို့မဟုတ် ၁၀ မိနစ်ခန့် အနားယူပေးပါ။ (၄) အလင်းရောင် မမှိန်ပါစေနဲ့။ လူငယ်တွေ တော်တော်များများ ဖုန်းရဲ့ theme ကို dark mode ထားတတ်ကြပါတယ်။ သာမာန်ကာလျှံကာ Facebook, youtube ကြည့်တာအတွက် အလင်းရောင်မှိန်မှိန်က အဆင်ပြေပေမဲ့ e book, pdf file ဖတ်တဲ့အခါမှာတော့ မျက်လုံးအားအရမ်းစိုက်ရတာမလို့ ဖုန်းအလင်းအားကို မြှင့်ထားဖို့ လိုအပ်ပါတယ်။ ညဘက်ဖုန်းသုံးတဲ့အခါတွေမှာလည်း အမှောင်ထဲမှာ သုံးတာထက် အခန်းမီးကို ဖွင့်ထားခြင်းက ပါဝါလေျာ့စေတဲ့နည်းမဟုတ်ပေမဲ့ ပါဝါထက်မတိုးအောင်တော့ ကူညီပေးနိုင်ပါတယ်။ (၅) မျက်စိအားတိုးဆေး မှီဝဲခြင်း နေ့တိုင်း မျက်စိလေ့ကျင့်ခန်းလေးလုပ်ပေးပြီး လိုအပ်တဲ့ဗီတာမင်အားဆေးတွေသောက်မယ်၊ အစားအသောက်ရွေးချယ်မယ်ဆိုရင် မျက်စိပါဝါလျော့မယ်၊ အနီးမှုန်အဝေးမှုန်တွေ၊ ဆလင်ဒါတွေ သက်သာလျော့ပါးသွားမယ့်အကောင်းဆုံးကာကွယ်နည်းပါပဲ။ ဗီတာမင် A ၊ ဗီတာမင် B အုပ်စု၊ lutein၊နဲ့ zeaxanthin တို့ပါဝင်တဲ့ မျက်စိအားဆေးတွေကို ဆရာဝန်အကြံပြုချက်အတိုင်း သောက်သုံးပေးသင့်ပါတယ်။
ဒီကာလမှာ လူကြီးလူငယ်မရွေး စိတ်သောကတွေ စိတ်ဖိစီးမှု အနည်းနဲ့အများ ရှိနေကြတဲ့အတွက် နေ့စဉ်အလုပ်တွေကို အရင်လို ဖြောင့်ဖြောင့်တန်းတန်း လုပ်နိုင်မှာ မဟုတ်ပါဘူး။ တချို့လူငယ်တွေဆိုရင် နေ့နဲ့ညလွဲပြီး အိပ်ချိန်တွေ ကမောက်ကမဖြစ်နေတတ်ကြပါတယ်။ ဒါပေမဲ့လည်း ကိုယ့်စိတ်ကိုယ် အလိုလိုက်ပြီး နေချင်သလိုနေရင် အချိန်ကြာလာတဲ့အခါမှာ ခန္ဓာကိုယ်အတွက် ဘေးထွက်ဆိုးကျိုးတွေ ဖြစ်လာနိုင်ပါတယ်။ စိတ်ဆောင်နေလို့သာ လုပ်နေရပေမယ့် အသက်ကလည်း ရှိသေးတယ်ဟုတ်။ အထူးသဖြင့် ညဘက်တွေမှာ အတွေးတွေလွန်ပြီး အိပ်ပျော်ရခက်တာ၊ အိပ်မပျော်တာတွေ များလာရင် ကိုယ်ကျန်းမာရေးရော စိတ်ကျန်းမာရေးပါ ထိခိုက်လာမှာပါ။ Overthinking တွေ စိတ်ဖိစီးမှုတွေကြောင့် အိပ်မပျော်ဘူးလား။ လူတစ်ကိုယ် စိတ်တစ်မျိုး။ တစ်ယောက်ချင်းစီမှာ စိတ်ညစ်ရတဲ့အကြောင်းလေးတွေ ရှိကြမှာပါ။ အထူးသဖြင့် အနာဂတ်အတွက် မသေချာတဲ့အချိန်မှာ အတွေးတွေက နှိပ်စက်နေလို အိပ်ပျော်ဖို့ခက်နေမှာပါ။ ဒါဆို စိတ်ဖိစီးမှု တွေ ကြားထဲမှာ ဘယ်လိုအိပ်ပျော်အောင်ကြိုးစားကြမလဲ။ ဒီနေရာမှာ ကိုင်တွယ်ဖြေရှင်းရမှာက စိတ်ဖိစီးမှုရယ်၊ အိပ်မပျော်တာရယ်ပေါ့။ အိပ်မပျော်လေလေ စိတ်ဖိစီးလေလေ ဖြစ်တာကြောင့် လုံးချာလည်လိုက်နေမှာပါ။ အဲဒီအတွက် ၂ ခုလုံးကို တစ်ပြိုက်နက်တည်း ဖြေရှင်းဖို့ လိုအပ်ပါတယ်။ အိပ်မပျော်တာကို ကုသနိုင်တဲ့ နည်းလမ်းတွေကတော့ အများကြီးရှိပါတယ်။ အဲဒီထဲမှာမှ ကိုယ်နဲ့ ကိုက်ညီအဆင်ပြေမယ့် နည်းလမ်းကို အသုံးပြုပြီးတော့ ကိုယ့်ရဲ့ ကျန်းမာရေးကို ဒီကာလမှာတော့ ဂရုစိုက်လိုက်ကြရအောင်။ စိတ်ငြိမ်နိုင်မယ့် အလုပ်တွေ အကုန်လုပ်ပါ။ တစ်ယောက်နဲ့ တစ်ယောက် စိတ်ငြိမ်စေတဲ့ အလုပ်တွေ မတူပါဘူး။ တချိုကလည်း စာအုပ်ဖတ်ရမှ၊ တချိုကလည်း သီချင်းနားထောင်ရမှ စသဖြင့် အကျင့်အမျိုးမျိုး ရှိပါတယ်။ သုတေသီတွေရဲ့ အကြံပေးချက်အရတော့ စာအုပ်ဖတ်တာက အိပ်ပေျာ်ဖို့အတွက် အမြန်ဆုံးနည်းလမ်းပဲ ဖြစ်ပါတယ်။ ညမအိပ်ခင် ၁၅ မိနစ်လောက်အလိုမှ ကိုယ်ကြိုက်တဲ့ စာအုပ်တစ်အုပ်ကို ဖတ်နေခြင်းကို သင့်ကို ပိုမို လျင်မြန်စွာ အိပ်ပျော်နိုင်ဖို့ အကူအညီပေးပါလိမ့်မယ်။ ဒီနေရာမှာ သတိထားရမှာတစ်ခုက သည်းထိတ်ရင်ဖိုစာအုပ်တွေ မဖတ်ဖို့ပါပဲ။ အိပ်ပျော်ဖို့ စာဖတ်ရာကနေ အတွေးတွေပိုလွန်ပြီး အိပ်မက်ဆိုးတွေပါ မက်နိုင်တာမလို့ အေးအေးဆေးဆေး ပေါ့ပေါ့ပါးပါး ရသစာပေကိုပဲ ရွေးချယ်ဖို့ တိုက်တွန်းပါရစေ။ အနည်းဆုံးတော့ အတွေးတွေ ခဏရပ်သွားမယ်။ အတွေးတွေ ရပ်သွားရင် အိပ်ပျော်ဖို့ လွယ်ကူသွားပါပြီ။ ၁။ ဖုန်းတွေ၊ TVတွေကို ရပ်ပါ။ လူတွေ အိပ်မပေျာ်ရတဲ့ အဓိက အကြောင်းအရင်းက ဖုန်းသုံးတာကြောင့်ပါ။ လူတိုင်းလည်း ဒီအချက်ကို သိကြပါတယ်။ ဒါပေမဲ့လည်း လိုက်နာဖို့က ထင်သလောက် မလွယ်ကူပါဘူး။ အိပ်ခါနီး ၁၅ မိနစ်လောက် သတင်းလေး ကြည့်မယ်လို့ ဆုံးဖြတ်ထားပေမဲ့ ည ၁၂ ထိုးလည်း ဖုန်းကို လက်က မချနိုင်၊ ၁ နာရီထိုးလည်း လက်ကမချနိုင်ဘဲ ဒီလိုနဲ့ပဲ အိပ်ရေးပျက်တဲ့ညတွေ သံသရာလည်နေတတ်ပါတယ်။ အထူးသဖြင့် ဖုန်းကနေထွက်တဲ့ အလင်းတန်းက လူတွေရဲ့ အိပ်စက်ချင်စိတ်ကို အနှောက်အယှက်ဖြစ်စေပါတယ်၊ ဒါ့ကြောင့်မလို့ သင်အိပ်ယာပေါ်ရောက်တာနဲ့ ဖုန်းကို သင်နဲ့ ခပ်ဝေးဝေးတစ်နေရာမှာ ထားခဲ့ပါ။ ပြီးရင် အသက်ရှုလေ့ကျင့်ခန်းတစ်ခုခုလုပ်တာပဲဖြစ်ဖြစ် အာရုံလွှဲထားလိုက်ပါ။ ၂။ ရေနွေးနွေးလေးနဲ့ ရေချိုးပါ။ ခုနက ဖုန်းမသုံးဖြစ်အောင် အာရုံလွှဲဖို့ အကောင်းဆုံးက ရေထချိုးလိုက်တာပါ။ ရေနွေးနွေးလေးနဲ့ ချိုး၊ အဝတ်အစားလေးလဲ၊ ရေမွှေးကြိုက်တဲ့သူက ရေမွှေးလေး စွတ်ပြီး အိပ်ဖို ပြင်လိုက်ရင် စိတ်ညစ်တာတွေ ပြေပျောက်ပြီး အိပ်ဖို့ ပိုလွယ်ပါတယ်။ ရေနွေးကလည်း တင်းမာနေတဲ့ ကြွက်သားတွေကို ဖြေလေျာ့စေပြီး အသားအရည်အတွက်လည်း ကောင်းတာမလို့ မစမ်းဖူးသေးရင် တစ်ခါလောက် ကြိုးစားကြည့်ဖို့ အကြံပြုချင်ပါတယ်။ ၄။ အိပ်တော့မယ့်အချိန်မှာ ဗိုက်ဆာမနေပါစေနဲ့။ ဗိုက်ဆာတာကလည်း အိပ်မပျော်ရတဲ့ အဓိကအကြောင်းအရင်းထဲက တစ်ခုဖြစ်ပါတယ်။ ဒီလိုပြောလို့ ညဘက်တွေမှာ အစားတွေ အများကြီးစားရမယ်ဆိုလိုတာ မဟုတ်ပါဘူး။ အထူးသဖြင့် အချိုဓာတ်နဲ့ ကစီဓာတ်များတဲ့ အစားအစာတွေစားမိရင် ရင်ပြည့်ရင်ကယ်ဖြစ်ပြီး ကိုယ်အလေးချိန်လည်း တက်လာစေနိုင်ပါတယ်။ ဒါပေမဲ့ ဗိုက်ဆာနေရက်နဲ့လည်း သင် လုံးဝ အိပ်ပျော်မှာ မဟုတ်ပါဘူး။ အဲဒီအတွက် ညစာစားပြီးချိန်မှာ ကယ်လိုရီပမာဏနည်းပြီး ကျန်းမာရေးနဲ့ ညီညွတ်တဲ့ အဆာပြေအစားအစာတွေ ဉပမာ- အသီးတွေ၊ အရွက်သုပ်တွေ၊ နွားနို့၊ ဒိန်ချဉ် စသဖြင့် စားပေးသင့်ပါတယ်။ အထူးသဖြင့် နို့ထွက်ပစ္စည်းတွေက အမီနိုပါတဲ့အတွက်ကြောင့် အိပ်ခါနီးမှာ နွားနို့ပူပူလေးတစ်ခွက်သောက်ခြင်းက သင့်ကို ကောင်းမွန်စွာ အိပ်ပျော်စေပြီး အရိုးအဆစ်တွေကိုပါ သန်မာလာစေမှာ ဖြစ်ပါတယ်။ ၄။ လေ့ကျင့်ခန်း လုပ်ပါ။ ပြင်းပြင်းထန်ထန် လေ့ကျင့်ခန်းထက် သွေးလည်ပတ်မှု ကောင်းရုံလောက် လုပ်စေချင်တာပါ။ သွေးလည်ပတ်မှု ကောင်းရင် ခန္ဓာကိုယ်ပူနွေးလာပြီး အိပ်လို့ ပိုလွယ်လာပါလိမ့်မယ်။ တကယ်လို့ သင်က အရင်တုန်းက လေ့ကျင့်ခန်း မလုပ်ခဲ့ဘူးဆိုရင် တစ်နေ့ကို မိနစ် ၃၀ လောက်အချိန်ပေးပြီး အေရိုးဗစ်လေ့ကျင့်ခန်းလောက်ဖြစ်ဖြစ် လုပ်ကြည့်ပါ။ နေ့ဘက်မှာ လေ့ကျင့်ခန်းလုပ်ထားတာကြောင့် ခန္ဓာကိုယ်က ပင်ပန်းပြီး ညဘက်ကျရင် အလွယ်တကူ အိပ်ပျော်ပါလိမ့်မယ်။ အကယ်၍ သင်က နှလုံးရောဂါရှိလို့ အမောမခံနိုင်လို့ မလုပ်နိုင်ဘူးဆိုရင် အကြောလေျာ့တာဖြစ်ဖြစ်၊ ခြေထောက် ၂ ခေျာင်းကို နံရံမှာ ၉၀ ဒီဂရီထောင်ထားလိုက်ပါ။ လိုရင်းက အကြောတွေ ပြေလျော့ပြီး သွေးလည်ပတ်မှုကောင်းရင် ခန္ဓာကိုယ် နွေးလာပြီး ပိုအိပ်ပျော်ဖို လွယ်လို့ပါ။ ၅။ အိပ်ရာမဝင်ခင်မှာ ကဖင်းဓာတ်ပါဝင်တဲ့ ကော်ဖီ မသောက်မိပါစေနဲ့။ ယနေ့ခေတ်လူအများစုက ကော်ဖီကို မသောက်ရမနေနိုင် စွဲလမ်းတတ်ကြပါတယ်။ နေ့ဘက်သောက်တာ အကြောင်းမဟုတ်ပေမဲ့ အိပ်ချိန်နဲ့နီးပြီး သောက်မိရင်တော့ တစ်ညလုံး ဇီးကွက်မျက်လုံးနဲ့ ငုတ်တုတ် မိုးလင်းသွားပါလိမ့်မယ်။ သူ့ရဲ့ ကဖင်းအာနိသင်က ၈ နာရီတောင် ကြာတာမလို့ သင့်ကို ညဘက်တွေမှာ နဂိုကထက်ကို အတွေးများစေပြီး သင့်ဉီးနှောက်ကို အလုပ်ပေးနေမှာ ဖြစ်ပါတယ်။ ကော်ဖီတင် မကဘဲ လက်ဖက်ရည်၊ ကိုလာနဲ့ ဆိုဒါပါဝင်တဲ့ အားဖြည့်အချိုရည်တွေအားလုံးမှာ ကဖင်းဓာတ်ပါဝင်တာကြောင့် ညဘက်မအိပ်ခင်မှာ နွားနို့ကလွဲရင် မသောက်သုံးတာ အကောင်းဆုံးပဲ ဖြစ်ပါတယ်။ ၆။ တစ်နေ့တာကို မအားလပ်ပါစေနဲ့။ တတ်နိုင်သမျှ တစ်နေ့တာကို အလုပ်အပြည့်ဆွဲထားပါ။ နားချိန်တွေမျာ လုပ်စရာတစ်ခုခုပါ ထည့်ဆွဲထားပါ။ ဥပမာ ဘယ်အချိန်က ဘယ်အချိန်မှာ နားမယ်။ နားတဲ့အချိန်မှာ စာဖတ်မယ်၊ သီချင်းနားထောင်မယ် စသဖြင့် ဆွဲထားပါ။ ဒီလိုမျိုး နေ့ဘက်မျာ အလုပ်အပြည့်လုပ်ထားမယ်ဆိုရင် ညဘက်မှာ အလွယ်တကူ အိပ်စက်နိုင်မှာပါ။ ၇။ အိပ်ရာကို သေချာပြင်ပါ။ တစ်နေ့မှာ ၆နာရီကနေ ၈နာရီလောက် အချိန်ဖြုန်းနေရတဲ့အတွက် အိပ်ရာကို ဖြစ်သလို မထားပါနဲ့။ အခန်းအပူချိန်ကို ရာသီဉတုနဲ့လိုက်ဖက်အောင် လိုသလိုညှိပါ။ ပူလွန်း အေးလွန်းနေြခင်းကလည်း နှစ်နှစ်ခြိုက်ခြိုက်အိပ်ပျော်ဖို့ အခက်အခဲဖြစ်စေပါတယ်။ အခန်းကို မီးမှိန်မှိန်လေးထားပါ။ တကယ်လို့ ပတ်ဝန်းကျင်က ဆူညံနေတတ်တယ်ဆိုရင် အသံလုံတဲ့ တံခါး သို့မဟုတ် နံရံပြောင်းလဲဖို့ ကြိုးစားပါ။ ၈။ နေ့လည်ဘက်တွေမှာ အလွန်အကျွန်မအိပ်စက်ပါနဲ့ တစ်ခါတလေ နေ့လည်ဘက် တစ်ရေးတစ်မောအိပ်လိုက်ဉီးမယ်ဆိုပြီး ၃ နာရီလောက် ကြာသွားတတ်ကြပါတယ်။ နေ့လည်ဘက်တွေမှာ ခဏတာ အိပ်စက်ခြင်းက ကျန်းမာရေးအတွက် ကောင်းပေမဲ့ နာရီဝက်ထက် ပိုသွားရင်တော့ ညဘက်အိပ်ပျော်ဖို့အတွက် ခက်ခဲလာနိုင်ပါတယ်။ ဒါ့ကြောင့် ညနေ ၃ နာရီကျော်ရင် မအိပ်တော့ပဲ အာရုံပြောင်းစရာ တစ်ခုခုလုပ်ပြီး ညဘက် စောစောအိပ်စက်သင့်ပါတယ်။ ရုံးတက်ရက်တွေမှာ စောစောအိပ်လိုက် ရုံးပိတ်ရက်တွေမှာ နောက်ကျလိုက်မလုပ်ဘဲ တက်နိုင်သလောက် ပုံမှန် အိပ်ချိန်ထားသင့်ပါတယ်။ ၉။ အိပ်ဆေးမှီဝဲခြင်း အထက်ပါနည်းလမ်းအားလုံးသုံးသော်လည်း အိပ်မပျော်နိုင်သေးသော လူတွေအတွက် နောက်ဆုံးရွေးချယ်မှုအနေနဲ့ ဆရာဝန်ရဲ့ ညွှန်ကြားချက်နဲ့အညီ အိပ်ဆေးသောက်သုံးနိုင်ပါတယ်။ မယ်လ်တိုနင် ပါဝင်မှုအနည်းအများကိုလိုက်ပြီး သင့်ကို အနှေးနဲ့အမြန် အိပ်ပျော်စေနိုင်ပါတယ်။ ဒါပေမဲ့ ရေရှည်သောက်သုံးရင် တခြားကျန်းမာရေးဘေးထွက်ဆိုးကျိုးတွေ ရှိနိုင်တာမလို့ အပေါ်က နည်းလမ်း ၈ မျိုးကို တတ်နိုင်သလောက် ကြိုးစားကြည့်ဖို့ တိုက်တွန်းပါရစေ။ စိတ်ဖိစီးမှု တွေကြောင့် အိပ်ဖို့ခက်တာက လူတိုင်း ကြုံရတဲ့ ကိစ္စပါ။ ဒါပေမဲ့ ကိုယ်နေကောင်းပြီး ကျန်းမာနေမှ၊ စိတ်ကြည်နေမှ မှန်ကန်တဲ့ ဆုံးဖြတ်ချက်ကို ချနိုင်မှာ ဖြစ်လို အားတင်းပြီး အိပ်ပျော်အောင် အိပ်ဖို့၊ ကျန်းမာရေး ဂရုစိုက်ဖို့ အကြံပြုချင်ပါတယ်။